“O‘zbekistonda meva-sabzavotchilik texnologiyalari bo‘yicha texnik ko‘mak” loyihasi haqida
Ma’lumki, so‘nggi yillarda O‘zbekistonning barcha jabhalarida bo‘lgani kabi qishloq xo‘jaligi sohasida ham faol islohot va taraqqiyot siyosati olib borilmoqda. Ayniqsa, hozirda mamlakat yalpi ichki mahsulotining 8,7 foizini tashkil qiladigan meva-sabzavotchilik yo‘nalishiga katta e’tibor qaratilgan, unga keng ko‘lamda chet el investitsiyalari hamda turli xalqaro tashkilotlarning kredit va grant mablag‘lari jalb qilinmoqda.
Shu jumladan, Xalqaro tiklanish va taraqqiyot banki ishtirokidagi (XTTB ulushi – 650,00 mln. AQSh dollari) “O‘zbekiston Respublikasida meva-sabzavotchilik tarmog‘ini rivojlantirish” loyihasi ham amalga oshirib kelinmoqda. Mazkur loyihaning qishloq xo‘jaligiga texnik yordam ko‘rsatish komponentini moliyalashtirish uchun Yevropa Ittifoqining 19,5 mln. Yevro miqdoridagi grant mablag‘lari O‘zbekiston Respublikasi va XTTB o‘rtasida 2018 yil 7 sentyabrda imzolagan Grant bitimi asosida jalb qilingan. Bu komponent O‘zbekiston qishloq xo‘jaligi sohasida tadqiqotchilik faoliyatini rivojlantirish, fermerlarga zarur texnologiyalar, soha bo‘yicha axborotlarni yetkazib berish, shuningdek, mahsulot sifati bo‘yicha xalqaro standartlarni joriy qilishni o‘z ichiga oladi.
Loyihaning “O‘zbekistonda meva-sabzavotchilik texnologiyalari bo‘yicha texnik ko‘mak” qismini O‘zbekiston qishloq xo‘jaligini 2030 yilgacha rivojlantirish va mamlakatning eksport salohiyatini rivojlantirish strategiyalariga mos ravishda olib boriladi. Mazkur komponentning asosiy maqsadi zamonaviy usullar va texnologiyalar yordamida meva-sabzavotchilik mahsulotlarini yetishtirish, saqlash, saralash va qadoqlash bo‘yicha ko‘rgazma maydonlarini tashkil qilish, sohada zamonaviy texnologiyalarni joriy qilish, meva-sabzavotchilik tarmog‘ining hosildorligini va rentabelligini oshirish, seleksiya, urug‘chilik va o‘simliklarni himoya qilish sohasidagi ilmiy-tekshirish institutlari salohiyatini modernizatsiya qilish kabilardan iborat.
"Global Advisors" MChJ esa jadal rivojlanayotgan kompaniya bo‘lib, 2017 yildan buyon Ozbekiston Respublikasi hududida turli sohalarda ishlaydigan yuridik shaxslarga biznes-rejalar, texnik-iqtisodiy asoslar va investitsiya loyihalarini ishlab chiqish, biznesni yanada rivojlantirish bo‘yicha maslahatlar berish, buxgalteriya hisobi va boshqa ko‘plab yo‘nalishlarda konsalting xizmatlarini taklif qilib keladi. Shuningdek, kompaniya o‘zining xorijiy hamkorlari bilan birgalikda turli loyihalar orqali xalqaro bilim va amaliyotlarni yurtimizga olib kirgan holda qishloq xo‘jaligi rivojiga bevosita hissa qo‘shib kelmoqda.
Loyiha butun O‘zbekiston hududi bo‘ylab uchta hududiy vakolatxonaga bo‘lingan holda amalga oshiriladi. Toshkentdagi bosh vakolatxona Toshkent, Sirdaryo, Farg‘ona, Andijon va Namangan viloyatlarini, Samarqanddagi hududiy vakolatxona Samarqand, Jizzax, Qashqadaryo, Surxondaryo, Buxoro va Navoiy viloyatlarini hamda Urganchdagi hududiy vakolatxona Xorazm viloyati va Qoraqalpog‘iston Respublikasini o‘z ichiga qamrab oladi.